2013 թ․-ին, Ն.Ս.Օ.Տ.Տ Գարեգին Բ Ամենայն Հայոց Կաթողիկոսի հայրապետական տնօրինությամբ, Մայր Աթոռ Սուրբ Էջմիածնում ստեղծվեց Եկեղեցական հայեցակարգային հարցերի գրասենյակը:
2013-2019 թթ. Եկեղեցական հայեցակարգային հարցերի գրասենյակի տնօրեն է եղել Գերաշնորհ Տ. Բագրատ եպիսկոպոս Գալստանյանը:
2019 թ․-ից առ այսօր գրասենյակի տնօրենն է Գերաշնորհ Տ. Վազգեն արքեպիսկոպոս Միրզախանյանը:
Գրասենյակի առաքելությունն է Աստվածաշնչի և Սրբազան Ավանդության, Տիեզերական և Տեղական ժողովների որոշումների, Եկեղեցու Հայրերի և Եկեղեցական կանոնների, ծիսակարգի և կոնդակների, հովվական խնամքի և այլ եկեղեցիների ու կրոնական համայնքների փորձառության հիման վրա ուսումնասիրել, քննել և հստակեցնել մեր ժամանակների մարտահրավերները, հասարակության կողմից առաջադրած հիմնախնդիրները և արտահայտել դրանց վերաբերյալ Հայ Եկեղեցու դիրքորոշումը:
Եկեղեցու համապատասխան դիրքորոշման վերաբերյալ պատրաստվող փաստաթղթի նպատակն է քրիստոնեական կենցաղավարության մասին ուսմունքով իր հետևորդներին արժանացնել Քրիստոսի փրկության շնորհին:
Հայաստանյայց Առաքելական Սուրբ Եկեղեցու սոցիալական ուսմունքը պետք է դառնա հասարակության մեջ առաջացած խնդիրների վերաբերյալ Մայր Աթոռի պաշտոնական դիրքորոշումը, սահմանի մի շարք ուղեցույցներ, որոնք կկիրառվեն հոգևորականների և Եկեղեցու հետևորդների կողմից:
Սոցիալական ուսմունքի հիման վրա հայեցակարգային գրասենյակն առաջարկում է քրիստոնեական կենսաէթիկայի, առողջապահության, բնապահպանության, դատաիրավական, սոցիալական, տնտեսական բնույթի խնդիրների, գիտության, կրթության, հիմնարար աստվածաբանական, կրոնագիտական, հասարակական, քաղաքական, պետության հետ փոխհարաբերությունների, միջկրոնական, միջդավանական հարաբերությունների, հասարակական լայն շրջանակներին վերաբերող հարցերի լուծումներ:
Եկեղեցու սոցիալական ուսմունքը Մայր Աթոռ Սուրբ Էջմիածնի, Հայաստանի Հանրապետության օրենսդիր և գործադիր իշխանությունների համար պետք է հանդիսանա կանոնների, օրենքների և որոշումների ընդունման ուղենիշ:
Գրասենյակը պարբերաբար մասնակցում է Մայր Աթոռ Սուրբ Էջմիածնում կազմակերպվող տարաբնույթ գիտաժողովների, քննարկումների, տարբեր հանձնախմբերի աշխատանքներին և այլ բնույթի միջոցառումներին:
Գրասենյակը զբաղվում է նաև Կաթողիկոսարանի, Դիվանատան, Վանական խորհրդի, տարբեր բաժինների և հանձնախմբերի կողմից հայեցակարգային հարցերին վերաբերող դիմումների ու նամակների քննարկմանը, խնդրո առարկա հարցերի վերաբերյալ կատարում է ուսումնասիրություններ, ինչպես նաև Մայր Աթոռի համապատասխան գրասենյակին է փոխանցում Եկեղեցու հայեցակարգային մոտեցումները:
Գրասենյակի գործառույթներից է նաև Մայր Աթոռի, թեմերի, եկեղեցական այլ բաժինների ու կառույցների առաքելության, գործառույթների վերաբերյալ հիմնավոր, գործնական առաջարկությունների պատրաստումը և դրանց ղեկավարներին ու ատենապետերին ներկայացումը:
Էլ. հասցե՝ [email protected]
Հեռ.՝ 010-517-165
010-517-166(167,168)