Գևորգյան հոգևոր ճեմարանում ուսանում են ապագա հոգևորականներ: Կրթական հոգևոր այս հաստատությունում ուսանողները նախապատրաստվում են իրականացնելու աստվածահաճո, հոգեխնամ ծառայություն՝ ստանալով բազմակողմանի գիտելիքներ՝ ուսումնասիրելով հայ հոգևոր և մշակութային հարուստ ժառանգությունը:
Խորհրդային վարչակազմի շրջանում, երբ փակվել էր Գևորգյան հոգևոր ճեմարանը, կրթության և հոգևոր դաստիարակության գործունեությունը շարունակում էր կարևոր և առաջնային մնալ հայ հոգևորականների և մասնավորապես կարթողիկոսների համար։
Իր հիմնադրումից ի վեր, Գևորգյան հոգևոր ճեմարանը պատրաստել է ոչ միայն հոգևորականներ, այլև աշխարհիկ ուսուցիչներ, մտավորականներ, գիտնականներ և մշակութային գործիչներ, որոնք իրենց գործունեությամբ կարևոր ներդրում են ունեցել Հայաստանում գիտակրթական կյանքի առաջընթացի համար:
Տարիներ շարունակ հոգևոր ճեմարանն իր շուրջն է համախբել բազմաթիվ հավատացյալ հայորդիների, որոնք ժամանակի պահանջներին համահուչ են դարձրել ճեմարանում գործող հոգևոր ծրագրերը և բարելավել կրթության մակարդակը։
1991 թ., Հայաստանի անկախության վերականգնումից հետո, Հայ Եկեղեցուն վերադարձվեց Գևորգյան հոգևոր ճեմարանի շենքը, որը զավթվել էր Խորհրդային Միության կողմից: 1996 թ. երջանկահիշատակ Գարեգին Ա Ամենայն Հայոց Կաթողիկոսի օրոք սկսվեցին և 1997 թ. ավարտվեցին ճեմարանի շենքի վերանորգման աշխատանքները։
1999 թ. Գարեգին Բ Ամենայն Հայոց Կաթողիկոսի անմիջական մասնակցությամբ սկսվեցին լայնածավալ կազմակերպչական, շինարարական աշխատանքներ իրականացնել։ Ամբողջովին փոփոխվեց հոգևոր ճեմարանի կրթական ծրագիրը, բարելավվեցին ուսանողների կեցության պայմանները, ավելացվեցին դասընթացներ, ընդլայնվեց ուսումնական պլանը:
2002 թ. Գևորգյան հոգևոր ճեմարանը ձեռք բերեց բարձրագույն ուսումնական հաստատության կարգավիճակ: Գարեգին Երկրորդ Ամենայն Հայոց Կաթողիկոսի նախաձեռնությամբ, հաշվի առնելով նորացված կրթական ծրագրերը, ՀՀ Կրթության և գիտության նախարարությունը ճեմարանին շնորհեց աստվածաբանական համալսարանի կարգավիճակ: 2004-2007 թթ. Գևորգյան հոգևոր ճեմարանը համապատասխան հավատարմագրերի և լիցենզիաների շնորհումով ստացավ բակալավրի և մագիստրոսի չափորոշիչներին համապատասխան կրթական ծրագրեր իրականացնելու իրավունք և անցավ Հայաստանի Հանրապետության բուհերում ընդունված կրթության երկաստիճան համակարգի: Այժմ սաներն ուսանում են ըստ վերոնշյալ ծրագրերի և ստանում աստվածաբանության բակալավրի (Դ լսարանում) և մագիստրոսի աստիճաններ (Զ լսարանում):
2012 թ. վերաբացվեցին Գևորգյան հոգևոր ճեմարանի ամբիոնները, որոնք կոչված էին ավելի բարձր մակարդակի հասցնելու ճեմարանի կրթության որակը: 2014 թ. մագիստրատուրայում կրթությունը ձեռք բերեց առավել նեղ մասնագիտացման երանգ՝ շնորհիվ բացված մասնագիտական հոսքերի (աստվածաշնչագիտություն, պատմական աստավածաբանություն, դավանաբանություն, գործնական աստվածաբանություն):
2016 թ. ՀՀ ԿԳՆ կողմից ճեմարանն ստացավ ասպիրանտուրա բացելու իրավունք, և 2018 թ. ընդունվեցին առաջին ասպիրանտները և մեկնարկեց առաջին ուսումնական տարին ասպիրանտուրայում: Այսուհետ ողջ Հայաստանի Հանրապետության տարածքում ճեմարանը միակ բուհն է, որ կարող է շնորհել աստվածաբանության թեկնածուի աստիճան:
Տեսուչ՝ Հոգեշնորհ Տ. Շահե ծայրագույն վարդապետ Անանյան
Հասցե՝ Վաղարշապատ, Մայր Աթոռ Սուրբ Էջմիածին
Հեռ.՝ 010-517-324
Էլ. հասցե.՝ [email protected]
Կայք՝ http://www.gevorgianseminary.am/