Մայր Աթոռ Սուրբ Էջմիածնի Տեղեկատվական համակարգը հիմնվել է 1994 թվականին: Սկզբում բաժինը կոչվել է «Մամլո դիվան»: Բաժնի գործունեությունը ներառում էր մամուլի տեղեկատվությունների պատրաստում և տարածում Մայր Աթոռ Սուրբ Էջմիածնից:
Ի սկզբանե Մամլո դիվանն ուներ 2 աշխատակից` պատասխանատու և թարգմանիչ: Առաջին պատասխանատուն էր Աբգար Ափինյանը: 2000 թ. Գարեգին Բ Ամենայն Հայոց Կաթողիկոսի տնօրինությամբ Մամլո դիվանը վերակազմավորվեց, անվանափոխվեց Տեղեկատվական համակարգի: Աշխատակազմը ընդարձակվեց և Տեղեկատվական համակարգի առաջին տնօրեն նշանակվեց Արշավիր Գաբուճյանը, այնուհետև` Գնել Նալբանդյանը, իսկ հետո արժանապատիվ Տ. Վահրամ քհն. Մելիքյանը: Տեղեկատվական համակարգի ներկայիս տնօրենը արժանապատիվ Տ. Եսայի քահանա Արթենյանն է, որը համակարգում է Տեղեկատվական համակարգի գործունեությունը, աշխատանքներ իրականացնում լրագրողների, լուսանկարիչների և տեղեկատվական հարթակում գործող տարբեր կառույցների պատասխանատուների հետ:
Տեղեկատվական համակարգի հիմնական նպատակն է համապարփակ տեղեկատվություն հաղորդել Հայաստանի և սփյուռքի զանգվածային լրատվամիջոցներին՝ Ամենայն Հայոց Հայրապետի և Մայր Աթոռ Սուրբ Էջմիածնի գործունեության վերաբերյալ (տե՛ս «Նորություններ» բաժինը):
Այսօր Տեղեկատվական համակարգը հայերեն և անգլերեն լեզուներով տեղեկատվություն է տարածում Հայաստանի և սփյուռքի շուրջ 200 լրատվամիջոցների, Հայ Եկեղեցու թեմերի, սփյուռքահայ ազգային կառույցների, անհատների: Նաև կազմակերպում է կրոնական դասընթացներ լրագրողների համար, հրապարակում է հեղինակային նյութեր, ապահովում է եկեղեցականների մշտական ներկայություն ԶԼՄ-ներում:
Համացանցային ծառայությունների գրասենյակ
Մայր Աթոռ Սուրբ Էջմիածնի Տեղեկատվական համակարգի գործունեությունը արդյունավորելու նպատակով Գարեգին Բ Ամենայն Հայոց Կաթողիկոսի տնօրինությամբ 2009 թվականին հիմնադրվում է Համացանցային ծառայությունների գրասենյակը, որի տնօրեն է նշանակվում է Փոլա Դևեջյանը: Սույն բաժինը զաբաղվում է Մայր Աթոռ Սուրբ Էջմիածնի պաշտոնական եռալեզու (անգլերեն, ռուսերեն, հայերեն) ՝ armenianchurch.org հասցեով գործող կայքի, հսկման, անխափան աշխատանքով և ապահովվում է անհրաժեշտ թարմացումները:
Համացանցային ծառայությունների գրասենյակը զբաղվում է սոցիալական ցանցերում Մայր Աթոռի լուրերի թարմացմամբ և առաջընթացով:
2018 թվականի նոյեմբերից առ այսօր տնօրենն է արժանապատիվ Տեր Համբարձում քահանա Դանիելյանը: