Ամենայն Հայոց Կաթողիկոս
Ուղերձ Աստվածածնի Ավետման և մայրության ու գեղեցկության տոնի առթիվ
Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի ուղերձը Ավետման և մայրության ու գեղեցկության տոնի առիթով
ՄԱՅՐ ԱԹՈՌ ՍՈՒՐԲ ԷՋՄԻԱԾԻՆ, ԱՊՐԻԼ 7
Մայր Աթոռ Սուրբ Էջմիածնից Հայրապետական Մեր օրհնությունն ենք բերում սիրեցյալ մեր ժողովրդի բոլոր զավակներին Ավետման շնորհաբաշխ տոնի բերկրալի առիթով եւ շնորհավորում բոլոր կանանց Մայրության եւ գեղեցկության օրվա կապակցությամբ:
Մեր աղոթքն ու հայցն է, որ Գաբրիել հրեշտակապետի կողմից Սուրբ Աստվածածնին տրված Ավետիսը` «Ուրախացիր, ով շնորհընկալ, Տերը քեզ հետ է», Աստծո Սիրո փրկարար խորհրդով, նորոգիչ ու կենսապարգեւ իր զորությամբ բնակություն հաստատի ընտանեկան բոլոր հարկերից ներս:
Թող Սուրբ Աստվածածնի գթառատ բարեխոսությամբ Միածին Որդին մայրության շնորհով զարդարի բոլոր կանանց եւ խաղաղության ու բարօրության մեջ պահպանի մեր մայրերին ու քույրերին` միշտ խինդով լեցուն ու երջանիկ, միշտ գեղեցիկ` օրհնված առաքինություններով ու բարեգործությամբ:
Շնորհք, սէր եւ խաղաղութիւն Տեառն մերոյ Յիսուսի Քրիստոսի եղիցին ընդ ձեզ. ամէն:
Օրհնությամբ` ԳԱՐԵԳԻՆ Բ
ԿԱԹՈՂԻԿՈՍ ԱՄԵՆԱՅՆ ՀԱՅՈՑ