Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

ԳԻՐ ՀԱՅՐԱՊԵՏԱԿԱՆ ՕՐՀՆՈՒԹԵԱՆ ԵՒ ԳՆԱՀԱՏԱՆԱՑ
ԱՌ ՍԻՐԵՑԵԱԼ ՈՐԴԻՍ ՄԵՐ ԵՒ ՀԱՐԱԶԱՏ ԶԱՒԱԿՍ
ՄԱՅՐ ԱԹՈՌՈՅ ՍՐԲՈՅ ԷՋՄԻԱԾՆԻ
ԱՆԴԱՄՍ ՍՈՑԻԱԼ ԴԵՄՈԿՐԱՏ ՀՆՉԱԿԵԱՆ ԿՈՒՍԱԿՑՈՒԹԵԱՆ

 Գոհունակութեամբ տեղեկացանք ԱՄՆ Հայոց Արեւմտեան Թեմի Առաջնորդ Գերաշնորհ Տ. Յովնան Արքեպիսկոպոս Տէրտէրեանից, որ Սոցիալ Դեմոկրատ Հնչակեան կուսակցութիւնը ծրագրում է Լոս Անջելեսում հանդիսաւորապէս նշել հիմնադրման 125-րդ տարեդարձը: Այս առիթով Մայր Աթոռ Սուրբ Էջմիածնից Հայրապետական Մեր օրհնութիւնն ենք յղում Կուսակցութեան Վարիչ Մարմնին եւ բոլոր անդամներին եւ շնորհաւորում յոբելեանի առիթով:

 Մեր ժողովրդի համար դժուարին ժամանակներում` 19-րդ դարի երկրորդ կեսերին հիմնուեց Սոցիալ Դեմոկրատ Հնչակեան կուսակցութիւնը, երբ մեր երկիրը բաժանուած էր արեւելեան ու արեւմտեան հատուածների` իրար հետ հակամարտութեան մէջ գտնուող ռուսական ու թուրքական կայսրութիւնների միջեւ: Յատկապէս ծանր էր Օսմանեան տիրապետութեան ներքոյ ապրող հայութեան վիճակը, որը հալածուում էր հայրենի հողից եւ ենթարկուում ծրագրուած աննախադէպ ցեղասպանութեան:

 Հնչակեան կուսակցութիւնը հիմնուեց մեր ժողովրդի ազատ ու պայծառ կեանքի ու հայրենի պետականութեան հաստատման տեսիլքով` մի խումբ մտաւորական հայորդիների կողմից: Նրանք ազնիւ նպատակ էին հետապնդում` միաւորել հայութեան ջանքերը յանուն մեր ժողովրդի արդար դատի եւ մեր իրաւունքների պաշտպանութեան: Տասնամեակների ընթացքին Հնչակեան կուսակցութիւնը արդիւնաւոր մասնակցութիւն բերեց մեր ազատագրական պայքարին, Հայրենիքի կողքին գտնուեց երկրորդ աշխարհամարտի ընթացքում, անկախութեան վերականգնման ու մեզ պարտադրուած Արցախեան պատերազմի տարիներին: Կուսակցութիւնը իր մասնաճիւղերով կարեւոր առաքելութիւն է մատուցում նաեւ Սփիւռքի մեր համայնքներում` ծառայելով հայապահպանութեան ու ազգային կեանքի պայծառութեան, հայորդիների կրթութեան ու դաստիարակութեան, հայ մշակոյթի զարգացման կարեւոր գործին:

 Մեզ համար առանձնակի գոհունակութիւն է նշել, որ Հնչակեան կուսակցութիւնն իր գործունէութեան ողջ ընթացքին դրսեւորել է անխախտ հաւատարմութիւն հանդէպ մեր հոգեւոր կենտրոն Մայր Աթոռ Սուրբ Էջմիածինը: Առաքելական մեր Սուրբ Եկեղեցու դարաւոր աւանդների պահպանութեան նախանձախնդրութեամբ կուսակցութեան շատ ու շատ անդամներ եղան Սուրբ Էջմիածնի շահերի պաշտպանը, ջանալով աւանդ բերել մեր Մայր Աթոռի շինութեանն ու պայծառութեանը ու մեր ժողովրդի կեանքում նրա տիրաւանդ առաքելութեան արդիւնաւորմանը:
 Յոբելեանի առիթով Հայրապետական Մեր գնահատանքն ենք յղում Սոցիալ Դեմոկրատ Հնչակեան կուսակցութեան Վարիչ Կազմին eu բոլոր անդամներին: Մաղթում ենք ազգօգուտ գործունէութեան նորանոր յաջողութիւններ ու ձեռբերումներ` առաւել զարդարելու eu հարստացնելու Սոցիալ Դեմոկրատ Հնչակեան կուսակցութեան պատմութիւնը:

 Աղօթքով ենք յիշում նաeu կուսակցութեան հիմնադիրներին ու նուիրեալ անդամներին, որոնք ապրեցին ու գործեցին Հայրենիքի ազատութեան ու պայծառութեան eu մեր ժողովրդի բարօրութեան տեսիլքով:

 Թող Տէրն Ամենակալ առատապէս օրհնի մեր ժողովրդի զաւակներին ի Հայրենիս eu ի Սփիւռս աշխարհի:

Շնորհք Տեառն մերոյ Յիսուսի Քրիստոսի եղիցին ընդ ձեզ eu ընդ ամենեսեանդ. ամէն:

Օրհնութեամբ՝

ԳԱՐԵԳԻՆ Բ
ԿԱԹՈՂԻԿՈՍ ԱՄԵՆԱՅՆ ՀԱՅՈՑ

 
Տուաւ Գիրս Օրհնութեան ի 30-ն Հոկտեմբերի
յամի Տեառն 2012, ի թուին հայոց ՌՆԿԱ
ի մայրավանս Սրբոյ Էջմիածնի
ընդ համարաւ 1380