Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

Գերաշնորհ Տ. Աշոտ եպիսկոպոս Մնացականյանը (ավազանի անունը՝ Գարուն) ծնվել է 1972 թ. նոյեմբերի 4-ին, Սյունիքի մարզի Գորիսի շրջանի Տաթև գյուղում:

1979-1989 թթ. սովորել է տեղի միջնակարգ դպրոցում:

1989-1995 թթ. սովորել է Մայր Աթոռ Սուրբ Էջմիածնի Գևորգյան հոգևոր ճեմարանում` պաշտպանելով ավարտաճառ «Հովհան Որոտնեցու կյանքն ու դավանաբանական հայացքները» թեմայով:

1995 թ. հոկտեմբերի 22-ին ձեռնադրվել է սարկավագ` ձեռամբ Գերաշնորհ Տ. Անանիա եպիսկոպոս Արաբաջյանի:

1995-1996 թթ. եղել է Մայր Աթոռի ձեռագրատան պատասխանատուն:

1996 թ. հունիսի 2-ին, ձեռամբ Գերաշնորհ Տ. Շահե արքեպիսկոպոս Աճեմյանի, ձեռնադրվել է կուսակրոն քահանա:

1996-2001 թթ. եղել է Հայաստանում Քրիստոնեությունը պետական կրոն հռչակման 1700-ամյակի եկեղեցական հանձնաժողովի` Մայր Աթոռի գրասենյակի պատասխանատուն:

2002 թ. պաշտպանել է վարդապետական թեզ` «Անառակ որդու առակը հայ մեկնողական գրականության մեջ» թեմայով, և ստացել վարդապետական 4 մասնավոր աստիճանները:

2002 թ. հոկտեմբերին, Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի բարձր տնօրինությամբ նշանակվել է Եգիպտոսի հայոց թեմի առաջնորդական փոխանորդ:

2004 թ. փետրվարի 21-ին ընտրվել է Եգիպտոսի հայոց թեմի առաջնորդական տեղապահ:

2005 թ. ընտրվել է Եգիպտոսի հայոց թեմի առաջնորդ:

2006 թ. հունվարի 15-ին, Սուրբ Էջմիածնի Մայր Տաճարում, ձեռամբ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի, ստացել է եպիսկոպոսական ձեռնադրություն և օծում: