Կառուցվել է 1908-1911 թթ.: Գտնվում է Մայրավանքի հյուսիսարևելյան կողմում: Յուրօրինակ սյուներով և կամարներով այս շենքը նախագծել է ճարտարապետ Պ. Զոհրաբյանը: Սկզբնապես պետք է ծառայեր որպես Հայ Եկեղեցու գունազարդ ձեռագրերի պահպանման վայր (Մատենադարան): Հայ Եկեղեցու ձեռագրերի լայն հավաքածուն այս շենքում պահպանվել է մինչև խորհրդային ժամանակաշրջանը: Այնուհետև հավաքածուն Մայր Աթոռից տեղափոխվել է Երևանի Ս. Մեսրոպ Մաշտոցի անվան Մատենադարան:
1945-1997թթ. այստեղ են անցկացվել Գևորգյան ճեմարանի դասերը: Ժամանակի պահանջներին հարմարացնելու նպատակով անհրաժեշտ է եղել ընդարձակել շենքը, ուստի՝ 1981 թ. (ըստ վերակառուցման հեղինակ Ա. Գալիկյանի ներկայացրած նախագծի) շենքն ընդարձակվել է հյուսիսային կողմից երկու հարկի հավելմամբ, արևմտյան կողմից` նոր մուտքի և սանհանգույցի կցակառուցմամբ: Շինարարական աշխատանքներն իրականացվել են 1983 թ. ՝ մեկենասությամբ Արշամ Պերպերյանի: Կառույցն այսօր ձեռք է բերել տնտեսական ու վարչական գործառույթ: Շենքն ունի հանդիսությունների դահլիճ: