Ղազարապատի հարավային երկայնքով ձգվում է Մայր Աթոռի միաբանական նոր կացարանը: Կառուցվել է Ամենայն Հայոց Կաթողիկոս Գարեգին Բ-ի կողմից` Հայ Եկեղեցու մեծ բարերար միչիգանաբնակ Ռիչարդ Մանուկյանի մեկենասությամբ:
Ճարտարապետն է Ռ. Ազատյանը: Հիմնարկեքը կատարվել է 2002 թ. օգոստոսի 31-ին: Բաղկացած է 82 կացարանից, որոնցից յուրաքանչյուրն ունի հյուրասենյակ, ննջասենյակ, բաղնիք: Բնակարանները հարմարավետ են և լավ կահավորված:
Կացարանի արևելյան կիսանկուղային մասում է գտնվում միաբանական սեղանատունը, որը բաժանված է հինգ մասի: Սենյակներում տեղակայված են օդափոխության և ջեռուցման համակարգեր, մյուս մասը վարչական և խոհանոցային սենյակներն են, իսկ բուն ճաշասրահները բաժանված են երեք մասի: Առաջին սրահը, որն ամենամեծն է, ճեմարանականների ամենօրյա և հանդիսավոր ճաշկերույթների համար է, մյուս՝ քիչ ավելի փոքր սրահը սարկավագների, իսկ փոքր սրահը ձեռնադրյալ հոգևորականների սնվելու համար է: