Պահոց շրջան է, որն ըստ ավանդության՝ սահմանվել է Ս. Գրիգոր Լուսավորչի կողմից։ Սկսվում է Մեծ պահքից 3 շաբաթ առաջ, Ս. Սարգսի տոնին նախորդող երկուշաբթի օրվանից։ Առաջավորաց պահքի 5-րդ օրը (ուրբաթ) հիշատակվում է Ս. Հովնանի քարոզությունն ու Նինվեի ապաշխարությունը, բայց ոչ իբրև Հովնան մարգարեի տոն, այլ իբր մեծ ապաշխարության և ծոմապահության օրինակ։ Խոր Վիրապից ելնելուց հետո Ս. Գրիգոր Լուսավորիչը դարձի եկած Տրդատ արքային, հայոց մեծամեծերին ու ողջ ժողովրդին, նախքան մկրտելը, պատվիրեց 5 օր ապաշխարել պահեցողությամբ: Ընդունված է համարել, որ այսպես հաստատվեց Առաջավորաց պահքը կամ Առաջավորքը` Հայ Առաքելական Եկեղեցու առաջին պահքը (որով և հիմնականում բացատրվում է նրա անունը): Պահքի ավարտի հաջորդ՝ շաբաթ օրը, Հայ եկեղեցին նշում է Սուրբ Սարգսի տոնը: