Մայր Աթոռ Սուրբ Էջմիածինը Հայաստանյայց Առաքելական Սուրբ Եկեղեցու հոգևոր և վարչական կենտրոնն է: Այստեղ է գտնվում հայ ժողովրդի ու նրա հավատի հավերժության խորհրդանիշ Լուսո խորան Մայր Տաճարը, որը հիմնվել է Հիսուս Քրիստոսի Իջմամբ և կառուցվել Ս. Գրիգոր Լուսավորչի ու Տրդատ Գ թագավորի կողմից:
Այն աշխարհասփյուռ հայության սրբազան ուխտատեղին է, ուր յուրաքանչյուր հայորդի անպարփակ սիրով ու աղոթքով է ոտք դնում: Մայր Աթոռ Ս. Էջմիածինը մեր անցյալի, ներկայի և ապագայի համադրությունն է:
Մայր Աթոռը իր աշխարհասփյուռ զավակներին է ներկայացնում հայոց բազմադարյա հարուստ պատմությունը, գրականության և արվեստի բացառիկ արժեքները, հոգևոր մշակույթի գանձերը: Մայր Աթոռ Ս. Էջմիածինը մեծ պատասխանատվություն է կրում թե՛ այստեղ ստեղծված և թե Եկեղեցուն նվիրաբերված մշակութային արժեքների պահպանության համար:
Էջմիածնի Մայր տաճարում են պահվում Հայ առաքելական եկեղեցու կարևորագույն սրբություններ Ս. Գեղարդը, Ս․ Թադեոս առաքյալի Աջը, Ս. Գրիգոր Լուսավորչի Աջը, Գետարգելի Ս. Նշանը, Նոյյան տապանից և Կենաց փայտից մասնիկներ, Հովհաննես Կարապետի, Պետրոս և Անդրեաս առաքյալների, Մատթեոս և Մարկոս ավետարանիչների, Ս. Հռիփսիմեի և Ս. Գայանեի մասունքները, Ս. Հակոբ Մծբնա հայրապետի Աջը, Ս. Արիստակես Ա Պարթևի Աջը, Ս. Գևորգ Զորավարի, Ս. Նիկողայոս Հրաշագործի մասունքները:
Կայքի այս հատվածում դուք հնարավորություն ունեք ծանոթանալու Մայր Աթոռի վարչական բաժինների, գրասենյակների և կառույցների գործունեությանը:
Այսօր, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհությամբ և շնորհաշատ առաջնորդությամբ, Մայր Աթոռ Սուրբ Էջմիածինը, հավատարիմ մնալով իր հոգեխնամ առաքելությանը, շարունակում է իրականացնել հոգևոր, մշակութային, գիտական, կրթական և սոցիալական բազմազան ծրագրեր Հայաստանում և Սփյուռքում: