1986 թ․ հիմնադրվեց տարածաշրջանային նշանակություն ունեցող Պրոկտոլոգիայի գիտահետազոտական ինստիտուտը, որը կոչված էր մասնագիտական բուժօգնություն ցուցաբերել Անդրկովկասի 3 հանրապետություններին։
ԽՍՀՄ-ի փլուզումից հետո կենտրոնը վերակազմակերպեց որպես բազմապրոֆիլ հիվանդանոց։
1998 թ. Հայկական Բարեգործական Ընդհանուր Միության և ԱՄՆ Միջազգային զարգացման գործակալության ջանքերով հիմնվեց և 2000 թ. շահագործման են հանձնվել Պլաստիկ և Ընդհանուր վիրաբուժության բաժինները:
2000թ. Հայ Բարեգործական Ընդհանուր Միությունը ձեռք բերեց և 2001թ. Մայր Աթոռ Սուրբ Էջմիածնին նվիրաբերեց այս ինստիտուտն այդ ժամանակ վերանվանվեց Ս.Ներսես Մեծ բժշկական կենտրոն, որը Հայ Առաքելական Սուրբ Եկեղեցուն հնարավորություն ընձեռեց շարունակել և ընդլայնել մատուցվող ծառայությունները:
2008-2012 թթ․ «Իզմիրլյան» հիմնադրամի և ՀԲԸՄ տնօրեն տիկին Լուիզ Մանուկյան Սիմոնի համագործակցությամբ հիվանդանոցը հիմնանորոգվեց և կառուցվեց նոր մասնաշենք: Վերանորոգումից հետո՝ 2012 թվականին, հիվանդանոցը վերանվանվեց «Իզմիրլյան» բժշկական կենտրոն՝ իր կազմում ընդգրկելով «Սուրբ Ներսես Մեծ» գիտակրթական կենտրոնը:
Բժշկական կենտրոնը պարբերաբար համալրվում է անհրաժեշտ բժշկական ժամանակակից սարքավորումներով և գործիքներով: Մայր Աթոռ Սուրբ Էջմիածնի բարերար Տիար Անդրե Կիսաջիկյանի (Բրազիլիա) ջանքերով Իզմիրլյան բժշկական կենտրոնը կահավորվել է: Ի նպաստ հիվանդանոցի գործունեության, «Սարգիս և Սիրան Գաբրիելյաններ» հիմնադրամի (ԱՄՆ) կողմից հաստատվել է հատուկ հիմնադրամ: «Բուլուքյան» հիմնադրամի (Ֆրանսիա) կողմից ամենամյա հատկացումներ են կատարվում բժշկական սարքավորումներ ձեռք բերելու նպատակով: Հիվանդանոցին արժեքավոր սարքավորումներ է տրամադրել նաև բժիշկ Կարո Դերձակյանը (ԱՄՆ):
«Իզմիրլյան» բժշկական կենտրոնն ունի 10 հիմնական բաժանմունք՝ 139 մահճակալով, շուրջ 280 աշխատակից` 63 առաջատար բժիշկ, 115 բուժքույր, սպասարկող ու ադմինիստրատիվ այլ աշխատակիցներ: Բժշկական կենտրոնում ամեն տարի իրականացվում է ավելի քան 7000 վիրաբուժական միջամտություն, և շուրջ 30,000 մարդ ենթարկվում է ախտորոշիչ և լաբորատոր հետազոտության:
Սուրբ Ներսես Մեծ գիտաբժշկական կենտրոնը «Իզմիրլյան» բժշկական կենտրոնի ծրագրերը համակարգում է Մխիթար Հերացու անվան Պետական բժշկական համալսարանի և Ազգային առողջապահության ինստիտուտի հետ:
Կենտրոնի բաժանմունքները համագործակցում են արտասահմանում բնակվող անվանի հայ բժիշկների հետ:
Կենտրոնի տնօրենն է բ․գ․դ, պրոֆեսոր Արմեն Չարչյանը (գործադիր տնօրենի ժ/պ՝ տիար Տիգրան Նալբանդյան): «Իզմիրլյան» բժշկական կենտրոնը նպատակ ունի ժամանակակից, բարձր տեխնոլոգիաների կիրառմամբ հիվանդներին ապահովել բժշկական որակյալ և մատչելի ծառայություններ: Կենտրոնը բարձրակարգ բժշկական ծառայություններ է մատուցում ոչ միայն Հայաստանում, այլև տարածաշրջանում:
«Իզմիրլյան» բժշկական կենտրոնի գործունեության հիմքում ընկած են կարևորագույն երեք սկզբունքներ` բժշկական ծառայությունների որակ, հասանելիություն և մատչելիություն:
2011 թ․ Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի տնօրինությամբ բժշկական կենտրոնում հիմնադրվել է հոգևոր տեսչություն: Իզմիրլյան ԲԿ-ում հոգևոր տեսուչներ են եղել՝
2011- 2016թթ. Գերաշնորհ Տեր Տաթև արքեպիսկոպոս Սարգիսեան,
2016-2019թթ. Արժանապատիվ Տեր Թադեոս քահանա Թադևոսյան,
2020 - 2022թթ. Արժանապատիվ Տեր Պողոս քահանա Միքայելյան,
2022 թ․ Արժանապատիվ Տեր Սահակ քահանա Սահակյան։
Հայաստանյայց Առաքելական Սուրբ Եկեղեցու թեմերի միջոցով կազմակերպվում են կենտրոնի բժիշկների ամենամսյա այցեր Հայաստանի տարբեր շրջաններ, գյուղեր ու քաղաքներ: Հատուկ խմբերի համար տրամադրվում են անվճար բժշկական ծառայություններ և խորհրդատվություն:
Հեռ. (010) 242024
Կայք՝ http://izmirlianmedicalcenter.com
Էլ. հասցե՝ [email protected]