Հնդկաստանում հայ երեխաներին հայեցի կրթելու համար ազգային ճեմարան ունենալու գաղափարն առաջադրվել է Աստվածատուր Մուրադխանյանի և Մնացական Վարդանյանի կողմից: Կալկաթայի Հայոց Մարդասիրական ճեմարանը (ՀՄՃ) (անգլ․ Armenian College and Philanthropic Academy) հիմնադրվել է 1821թ. ապրիլի 2-ին:
Մարդասիրական ճեմարանը սփյուռքում գործող հին հայկական կրթական հաստատություններից մեկն է, որը հիմնադրման օրվանից անխափան գործում է մինչև այսօր: 1824թ.-ից Հայոց Մարդասիրական ճեմարանում շուրջ 50 տարի գործել է տպարան: Այստեղ է գտնվում նաև «Արարատյան» գրադարանը, որը հիմնվել է 1828թ.-ին: Գրադարանն ունեցել է հայկական գրքերի և ձեռագրերի՝ ժամանակի ամենամեծ հավաքածուն:
Ճեմարանում դասավանդել են անվանի մտավորականներ Հարություն Գալուցյանը, Մեսրոպ Թաղիադյանը և ուրիշներ:
Մինչեւ 1870թ. ճեմարանն ունեցել է իր ինքնուրույն կրթական ծրագիրը, սակայն հետագայում համապատասխանեցվել է Կալկաթայի համալսարանի քննությունների պահանջներին: 1883թ. հաստատությունը պաշտոնապես ճանաչվել է որպես միջնակարգ դպրոց, իսկ 1888թ. դասվել է Կալկաթայի համալսարանի քոլեջների շարքին:
1999թ. Կալկաթայի Գերագույն դատարանի որոշմամբ ճեմարանը հանձնվել է Մայր Աթոռ Սուրբ Էջմիածնի խնամակալությանը` ի դեմս Ամենայն Հայոց Կաթողիկոսի: Նույն որոշմամբ Ամենայն Հայոց Կաթողիկոսին է վերապահվել ճեմարանի գործունեությունը տնօրինելու իրավունքը: Ուսումնական ծրագրերը, կադրային նշանակումները, դպրոցի վիճակն ու խնամքը վերահսկվում են Մայր Աթոռի կողմից:
Հայոց մարդասիրական ճեմարանը հիմնադրման օրվանից ի վեր լավագույնս կրթել է հազարավոր հայ երեխաների: Այսօր էլ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի հայրական օրհնությամբ և բարձր տնօրինությամբ Հայոց մարդասիրական ճեմարանը շարունակում է իր կրթական առաքելությունը:
Իրականցվում են բազմաթիվ ծրագրեր՝ ճեմարանում որակյալ կրթություն ապահովելու և ապագա սերունդներին հայեցի դաստիարակելու համար:
Հայոց մարդասիրական ճեմարանը երկսեռ, գիշերօթիկ դպրոց է: Ճեմարանը Նոր Դելիի՝ հնդկական տասնամյա դպրոցական կրթության որակավորման խորհրդի (Indian Certificate of Secondary Education (ICSE) անդամ է և աշակերտներին պատրաստում է 10-րդ դասարանի ավարտական քննություններին:
Ներկա պահին հաստատությունում սովորող աշակերտների մեծ մասը Հայաստանից է, սովորում են նաև հայ աշակերտներ՝ Սփյուռքից (Հնդկաստան, Ռուսաստան, Մյանմար, Իրաք, Իրան):
Աշակերտների և ուսուցիչների կեցության, սննդի, գրենական պիտույքների, ուսման վարձի և աշխատավարձերի ծախսերն ամբողջությամբ հոգում է ճեմարանը: Ուսուցման լեզուն հիմնականում անգլերեն է: Ճեմարանում հայագիտական և բնագիտական առարկաներից բացի, աշակերտները սովորում են նաև հնդկերեն, ռուսերեն և այլ օտար լեզուներ: Բարձր առաջադիմություն ունեցող աշակերտներին հնարավորություն է տրվում շարունակելու ուսումը Հնդկաստանի և աշխարհի տարբեր բարձրագույն ուսումնական հաստատություններում:
Ճեմարանն ունի ֆուտբոլի և բասկետբոլի ընդարձակ խաղադաշտեր, լողավազան, մարզասրահ, մանկական խաղահրապարակ:
Ճեմարանի կառավարիչ՝ Տ. Տաճատ վարդապետ Ծատուրյան
Էլ. փոստ`[email protected]
Հեռ.: 91 (033) 40109115
Կառավարչի օգնականներ՝
Տ. Հայկ քահանա Քոչարյան
Տ. Արծրուն քահանա Միքայելյան
Տնօրեն՝ Տիկին Դեբանջալի Չաուդհուրի
Էլ. փոստ` [email protected]
Հեռ.: 91 (033) 40109114
Հասցե` Armenian College and Philanthropic Academy
56B, Mirza Ghalib Street (Free School Street),
Kolkata - 700 016, West Bengal, India
Հեռախոս` 91 (033) 40109051 / 22299051
Հեռատիպ (ֆաքս)՝ 91 (033) 22275869
Էլ. փոստ` [email protected]
Կայքէջ` www.armeniancollege.edu.in