Մայր Աթոռ Սուրբ Էջմիածնի հովանու ներքո գործող «Էօրնեկեան հանրակրթական դպրոց» հանրակրթական ուսումնական հաստատություն-հիմնարկը հիմնադրվել է Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի կողմից 2009 թ.։ Դպրոցի ներկայիս շենքը կառուցվել է ՀՀ Ազգային հերոս, արգենտինահայ գործարար և բարերար Էդուարդո Էօրնեկեանի հովանավորությամբ, և 2009 թ. սեպտեմբերի 1-ից կրում է վերջինիս անունը՝ ծառայելով որպես հայ-արգենտինական հարատև բարեկամության ամուր կամուրջ: Հիմնադրումից մինչև 2018 թ․ դպրոցը հաջողություններ և ձեռքբերումներ է արձանագրել Գերաշնորհ Տ․ Վարդան եպիսկոպոս Նավասարդյանի տեսչության օրոք։
Էօրնեկեան հանրակրթական դպրոցը եռաստիճան է՝ տարրական, միջին և ավագ բաղադրիչներով: Դպրոցն անվճար է, իսկ կրթությունն իրականացվում է պետական ծրագրով:
Դպրոցում կրթության ավանդական եղանակները զուգակցված են նոր մեթոդներով ու եղանակներով՝ ապահովելու ուսումնական գործընթացի բարձր արդյունավետություն: Դպրոցի առողջ և թափանցիկ գործունեությունը հիմնված է մի քանի սկզբունքների վրա`
- ուսման նկատմամբ բացառիկ պահանջկոտություն,
- հմուտ, փորձառու և աշակերտակենտրոն ուսուցում իրականացնող ուսուցիչների ներգրավում,
- մարդու բարոյական նկարագրի հետևողական կայացում,
- ինտելեկտուալ ու զարգացած անհատի համակողմանի ձևավորում,
- աշակերտների մեջ ինքնավստահության սերմանում,
- գործնական կարողությունների ու մասնագիտական հետաքրքրությունների ձևավորում և զարգացում։
Դպրոցը համալրված է առարկայական լաբորատորիաներով՝ աշակերտների ուսումնառության գործընթացն առավելագույնս արդյունավետ կազմակերպելու, նրանց հնարավորություն ընձեռելու գործնականում տեսական գիտելիքները փորձարկելու, միջառարկայական կապերը տեսնելու և իրենց մտածողության սահմաններն ընդլայնելու համար: Դասասենյակները զինված են համակարգիչներով և տեսացրիչներով՝ ապահովելու դասապրոցեսի մատչելիությունն ու ինտերակտիվությունը, ինչպես նաև աշակերտների ակտիվ ներգրավվածությունը:
Էօրնեկեան հանրակրթական դպրոցում գործում են վեց առարկայական մասնախմբեր՝
- հայոց լեզվի և գրականության,
- պատմության,
- բնագիտամաթեմատիկական,
- օտար լեզուների,
- տարրական դասարանների,
- ֆիզիկական և հոգևոր զարգացվածության։
Դպրոցը հատուկ ուշադրություն է դարձնում դպրոց-հասարակական կյանք կապի ապահովմանն ու մշակութային դաստիարակությանը: Կարևորելով և խրախուսելով աշակերտների մասնակցությունը տարբեր մրցույթներին՝ դպրոցը նախապատրաստում է վերջիններիս միջազգային և հանրապետական տարբեր առարկայական օլիմպիադաների:
Դպրոցում հոգևոր կրթությունն ընկալվում է համամարդկային արժեքների և աշակերտների հոգևոր դաստիարակության համատեքստում, որի վերջնանպատակն է ձևավորել ազգային-հոգևոր ու բարոյական արժեքներին հավատարիմ անհատներ։
Աշակերտների հոգևոր կրթությունը և դաստիարակությունը խթանելու նպատակով դպրոցն իրականացնում է մի շարք միջոցառումներ, այդ թվում՝ ուխտագնացություններ դեպի հայոց սրբավայրեր, մարդասիրական և բարեսիրական տարաբնույթ ծրագրեր (այցելություններ մանկատներ, ծերանոցներ, աջակցություն սահմանամերձ դպրոցներին) և այլն։ Աշակերտներն իրենց նախաձեռնությամբ ներգրավվում են ազգային-եկեղեցական մեծ տոների ու ծիսական արարողությունների կազմակերպման գործում։
Դպրոցի ուսումնական ամեն օրը սկսվում է անձնակազմի, ուսուցչական կազմի և աշակերտների միասնական Տերունական ու աշակերտական «Արարիչ անճառելի» աղոթքներով։
Դպրոցում հաճախ կազմակերպվում են հանդիպումներ հոգևորականների, մտավորականների և իրենց ասպարեզում հաջողության հասած անհատների հետ՝ օգնելով աշակերտներին մասնագիտական կողմնորոշման հարցում։
Դպրոցի 33 դասարաններում այժմ ուսանում է 495 աշակերտ։
Տեսուչ՝ Արժանապատիվ Տ․ Արսեն քահանա Միրզոյան
Դպրոցի տնօրեն՝ Սուսաննա Վարդանյան
կայք՝ www.eurnekianschool.am
Էլ փոստ՝ [email protected]
Հեռ. (0231) 52428